Мужской хор ИПК 'Валаам' все тексты (слова) песен, переводы, видео, клипы

Буди благословен день и час, в оньже Господь мой Иисус Христос мене ради родися, распятие претерпе и смертию пострада.
О, Господи Иисусе Христе, Сыне Божий! В час смерти моея приими дух раба Твоего в странствии суща, молитвами Пречистыя Твоея Матере и всех святых Твоих, яко благословен еси во веки веков. Аминь.

Днесь земля Русская предстоит Богу / и плод святаго Крещения Ему приносит, / Ангели, радующеся, славословят, / и вси святии с Богородицею, ликующе, поют: / Христос воцарися, Христос прославися. / Велий еси, Господи, и чудна дела Твоя, // Боже наш, слава Тебе.

Начало крещения страшнаго, / имже паки крестися земля Русская, / восхвалите, о горы Киевския, / крестом апостола Андреа благословенныя. / Идеже бо благодать возсия роду нашему / от веры же и Духа во отверзение Царствия Божия, / тамо подобаше начатися и сему обновлению / кровию первозакланнаго от святителей русских, / тезоименнаго просветителю нашему. / Сей бо Владимир новый, / из виноградника своего изведен / за врата священныя Лавры Печерския, / венчания Стефанова сподобляется, / прощая и благословляя убивающих его, / яко кроткий молитвенник о душах наших.